ቅዱሳን መላእክት ከተፈጠሩባት ከመጀመሪያዋ እለተ እሁድ አንስቶ እስከ ዛሬ ወደፊት ለዘለዓለም እግዚአብሔርን በቅድስና የሚያገለግሉ ተፈጥሮአቸው የተቀደሰ ሕይወታቸውን በቅድስና የተሞላ ነው፡፡
ቅዱሳን መላእክት በመንፈሳዊ ዓለም እየኖሩ በሰማይም በምድርም በእግዚአብሔርና በሰው ፊት የቅድስናን መንፈሳዊ ሥራን ይሰራሉ፡፡
የጹሑፉ ዓላማ
የቅዱሳን መላእክት ተፈጥሮና ባሕሪያቸውን ማሳወቅ
ቅዱሳን መላእክት ከእግዚአብሔር የተሰጣቸውን ስልጣንና አገልግሎታቸውን ለምእመናን ማስገንዘብ
የቅዱሳን መላእክት ክብራቸውን ልዕልናቸውን ማሳወቅ
የቅዱሳን መላእክት አማላጅነት ማስገንዘብ
የሰባቱ ሊቃነ መላእክት ሥልጣንና ተግባር እንዲሁም የአሥሩን ነገደ መላእክት አሰፋፈራቸውን ማሳወቅ፡፡
የቅዱሳን መላእክትን በዓላት ለምዕመኑ ማሳወቅ
‹‹መላእክት›› የቃሉ ትርጉም
መላእክት የሚለው ቃል በ3 መንገድ ሊተረጐም ይችላል፡፡
‹‹መላእክት›› ማለት፡- መልእክተኞች፣ ተላላኪዎች ማለት ነው፡፡
ይህን ተግባር የሚፈፅሙት ቅዱሳን ሰማይውያን መላእክት ናቸው፡፡ የእርቅ መልእክተኞች ናቸውና፡፡‹‹መላእክት›› ማለት አለቆች፣ ገዢዎች ማለት ነው፡፡
ይህ ደግሞ በሥልጣን ኮርቻ ላይ ላሉ ሰዎችና ለቤተክርስቲያን አስተዳዳሪዎች አለቆች የሚሰጥ ስያሜ ነው፡፡ ራዕይ 1¸20 ‹‹በቀኝ እጄ ያየሃቸው የሰባቱ ከዋክብትና የሰባቱ የወርቅ መቅረዞች ምስጢር ይህ ነው፡፡ ሰባቱ ከዋክብት የሰባቱ አብያተ ክርስቲያናት መላእክት ናቸው፣ ሰባቱም መቅረዞች ሰባቱ አብያተ ክርስቲያናት ናቸው›› እንዲል፡፡‹‹መላእክት›› ማለት ከክብር ይልቅ ኃሣርን መርጠው የተዋረዱትን ርኩሳን መናፍስት አጋንንትን መላእክት ይላቸዋል፡፡
ማቴ 25 41 ‹‹እናንተ ርጉማን ለሰይጣንና ለመላእክተኞቹ ወደተዘጋጀ ወደዘለዓለም እሳት ከእኔ ሄዱ›› እንዲል፡፡
ቅዱሳን መላእክት ለምንና እንዴት ተፈጠሩ?
ቅዱሳን መላእክት በእለተ እሁድ በወርኃ መጋቢት 29 ቀን በመጀመሪያው ሰዓት ተፈጥረዋል፡፡
እግዚአብሔር ቅዱሳን መላእክትን ሲፈጥር ‹‹እምኅበ አልቦ ኅበቦ›› ካለመኖር ወደመኖር አምጥቶ ፈጥሮአቸዋል፡፡
አፈጣጠራቸውም እንደሰው በነቢብ /በመናገር/ ሳይሆን በአርምሞ /በዝምታ/ ተፈጥረዋል፡፡ ሊፈጥራቸው አስቦ ፈጠራቸውም
የተፈጠሩበትም ዓላማ የሰውን ልመና፣ ንስሐ ወደእግዚአብሔር፣ የእግዚአብሔርን ምሕረት ወደ ሰው ለማድረስና መንፈሳዊ ሥራ ለመስራት እግዚአብሔርን ለማመስገን ተፈጥረዋል፡፡
የቅዱሳን መላእክት የተፈጥሮ ሁኔታ /ኩነተ ተፈጥሮ/
ቅዱሳን መላእክት ተፈጥሮአቸው ኢመዋትያን /የማይሞቱ/ ናቸው፡፡ ዝንተ ዓለም በቅድስና ቆመው እግዚአብሔርን ሲያገለግሉ ይኖራሉ፡፡
ቅዱሳን መላእክት ፈጻምያነ ፈቃድ ናቸው የእግዚአብሔርንና የሰውን ፈቃድ ሲፈጽሙ ይኖራሉ፡፡
ቅዱሳን መላእክት (አልቦ ፍፃሜ ለመዋዕሊሆሙ) ለዘመናቸው ፍፃሜ አይነገርላቸውም፡፡
ቅዱሳን መላእክት ተፈጥሮአቸው ከእሳትና ከነፋስ ነው፡፡
መዝ 103¸4 ‹‹መላእክቱን መንፈስ የሚያደርግ አገልጋዩቹን የእሳት ነበልባል›› እንዲል
ነገር ግን ከእሳትና ከነፋስ ተፈጠሩ ሲል ግብራቸውን ለመግለፅ እንጂ እንደምናየው እሳትና ነፋስ ቢሆኑ ኖሮ እንደእኛ ሰዎች ፈርሰው በስብሰው በቀሩ ነበር፡፡ ነገር ግን ከእውነተኛ አምላክ ብርሃን ተፈጥረዋልና እንደ እሳት ኃያላን፣ እንደእሳት ብሩሃን አእምሮ፣ እንደነፋስ ፈጣን፣ እንደነፋስ ረቂቅ መሆናቸውን ለመግለጽ ከእሳትና ከነፋስ ተፈጠሩ ይላቸዋል፡፡
ዓለመ መላእክትና አሰፋፈራቸው
ከሰባቱ ሰማያት መካከል ሦስቱ ሰማያት ማለትም ዓለመ መላእክት የመላእክት ከተማ /መኖሪያ/ ሲሆኑ እግዚአብሔር ቅዱሳን መላእክትን በነገድ መቶ (100) በከተማ አሥር (10) አድርጐ በሦስቱ ሰማያት በኢዮር፣ በራማና በኤረር አስፍሯቸዋል፡፡ በመቀጠልም በእያንዳንዱ ሰማይ የተፈጠሩትን ነገደ መላእክት እንመለከታለን፡፡
ይቆየን
ይቀጥላል
0 comments:
Post a Comment